Kantidad nga ₱7.77 milyones nga pondo ang gipagawas sa Department of Science and Technology–IX (DOST-IX) sa 2025 aron suportahan ang mga komunidad sa probinsya pinaagi sa siyensya, teknolohiya, ug inobasyon.
Ang pondo gipanghatag sa tulo ka lungsod, matag usa nagrepresentar sa kongresyonal nga distrito sa Zamboanga del Norte. Ang mga proyekto gihimo ubos sa programang Community Empowerment thru Science and Technology (CEST), nga tumong motabang sa panginabuhian, edukasyon, kahimsog, kahandam sa kalamidad, ug pagpanalipod sa kalikupan.
Sa Piñan, kapin ₱2.47 milyones ang gigamit alang sa pagtukod og buko juice production facility, paghatag og makina sa pagdugmok sa botelya, ug pagbutang og modernong science equipment sa mga eskwelahan.
₱2.94 milyones usab sa Manukan ang gipundo para sa pagtukod og panaderya sa Barangay Meses, pag-install og solar-powered nga sistema sa tubig sa Barangay Patagan, ug paghatag og science technology sa usa ka lokal nga eskwelahan.
Samtang sa Baliguian, ₱2.35 milyones ang gigahin alang sa pasilidad sa pagproseso sa dayok ug bottled sardines, pagbutang og tsunami alert system, pagbansay sa emerhensya, ug paghatag og digital learning resources sa mga eskwelahan.
Matod sa DOST-IX, ang mga proyekto kabahin sa padayon nga paningkamot sa ahensya aron mapaayo ang kahimtangan sa panginabuhi ug mapalig-on ang kahandam sa mga komunidad sa Zamboanga del Norte.(IKEN B. GULLEM)
Source: DOST Regional Office No. IX