Ubay-ubay sa atong mga mamaligya-ay og karne o meatshops dinhi sa dakbayan ang namatud-ang adunay mga nahimong kalapasan sigun sa makita gikan sa “Task Force Bantay Karne Operations Consolidated Report” nga gisubmiter sa Task Force Bantay Karne ning siyudad.
Ang nasangpit nga report maoy nahimong resulta sa gipahigayong tulo (3) ka adlaw nga Bantay Karne operations pinaagi sa paghimo sa kalit nga inspeksiyon, ebalwasyon ug pagsubay sa tanang mga patigayon nga nagbaligya og karne dinhi palibot sa dakbayan.
Sa maong operasyon, gawas sa paghiling sa mga dokyumento sa nasangpit nga mga patigayon, lantawon usab ang kinatibuk-ang kalidad sa hingtungdang balay patigayon sama sa kalimpiyo, pagdumala ug uban pang aspeto nga naglambigit sa nasangpit nga negosyo.
Sa unang adlaw, October 3, 2022, mokabat ngadto sa 25 ka mga meatshops og 11 ka mga meat stalls dinha sa Central Public Market ang nakitang adunay mga nahimong paglapas sa Akta Republika 9262 o Meat Inspection Code of the Philippines ug sa Akta Republika 7396 o nailang The Consumer Act of the Philippines.
Lakip sa nabatyagan sa Task Force mao ang mga mosunod nga paglapas sama sa: A) walay business permits, B) walay health certificates, C) walay Meat Handlers certificate, D) kapakyas sa pagdisplay sa mga nahisgotang dokyumentos, lakip na sa pagsusi usab sa mga timbangan kon kini ang na-calibrate ba, ug uban pa.
(Source: Dipolog City Government Facebook page)