Nagpadayon ang pagpasigarbo sa Dakbayan sa Dapitan human nakab-ot sa usa ka batan-ong estudyante ang bag-ong kalampusan sa nasudnong entablado sa arts ug culture.
Si Hazel Dianne D. Vilar, residente sa Barangay Larayan ug estudyante sa Jose Rizal Memorial State University (JRMSU), nakadawat og pag-ila sa Photo Contest Category atol sa PASUC 2026 National Culture and the Arts Festival nga gipahigayon sa Iloilo City.
Isip representante sa JRMSU, gipakita ni Vilar ang iyang talagsaong abilidad sa photography ug artistikong panan-aw, nga nakaagaw og pagtagad taliwala sa daghang kalahok gikan sa nagkalain-laing state universities ug colleges sa tibuok nasud. Ang iyang kalampusan nagpunting sa nagkadako nga presensya sa Dapitan sa larangan sa kultura ug arts.
Dako usab ang papel sa iyang mga mentor sa maong kadaugan. Gipangulohan ni Prof. John Philip Racaza ug Prof. Jessie Flores, ang lig-on nga suporta ug giya nga ilang gihatag nakatabang pagpalambo sa talento ni Vilar. Gisuportahan usab kini sa administrasyon sa unibersidad ubos sa pagpanguna ni Dr. Patrick Gallieto ug University President Dr. Maria Rio Abdon-Naguit.
Ang maong kalampusan nagpakita sa dedikasyon, disiplina, ug gugma sa kabatan-onan sa Dapitan sa ilang gipiling larangan. Pinaagi niini, si Vilar nahimong inspirasyon sa ubang batan-on nga padayon nga maningkamot ug magdala og dungog sa ilang lungsod sa mas halapad nga entablado.(IKEN B. GULLEM)
Source: City Government of Dapitan