Mas gipahugtan ang kahibalo sa mga inahan ug caregivers ang kabahin sa pag-atiman sa panglawas sa pamilya pinaagi sa usa ka Mothers’ Class, nga gipahigayon niadtong Septiyembre 16,2026,nga nagtutok sa maternal ug child health, nutrisyon ug paglikay sa mga sakit sa pamilya
Gipangulohan ang kalihokan ni NDP Genevieve Joy Buque, samtang si Dr. KLyde Keenen Bingat maoy resource speaker.
Gitumong sa kalihokan nga mahatagan ang mga partisipante og praktikal ug kasaligan nga impormasyon aron mas husto ang ilang mga desisyon alang sa kahimsog sa ilang mga anak ug pamilya.
Gihisgutan usab ang importansya sa hustong nutrisyon, breastfeeding, personal hygiene ug sanitation, immunization, disease prevention ug family planning.
Gipasiugda nga dako ang papel sa mga inahan sa pagpanalipod sa panglawas sa panimalay, busa ang paghatag kanila og hustong kahibalo giila nga usa ka importanteng lakang sa pagtukod og mas himsog ug lig-on nga mga pamilya ug komunidad.
Gidasig usab ang mga inahan nga gamiton sa husto ang ilang nakat-unan, ipaambit ang tukmang impormasyon ug mahimong ehemplo sa paghimo og himsog nga mga pagpili sulod sa ilang pamilya.(MEDALYN U. BORJA)
Source: RIZAL RURAL HEALTH UNIT