Gipakusog sa Bureau of Fire Protection (BFP) ang kahibalo sa balaod ug hustong pagpatuman sa mga polisiya sulod sa ilang organisasyon pinaagi sa Legal Guidance and Awareness Caravan nga gipahigayon niadtong Septiyembre 16, 2026 sa Zamboanga del Norte.
Mitambong sa kalihokan ang mga personnel sa BFP Dipolog City Fire Station ubos sa pagpangulo ni FSINSP Aprilyn B. Barbaso, Acting City Fire Marshal, kauban si FSUPT Richard C. Timosa, RN, JD, DSC, Acting Provincial Fire Marshal sa Zamboanga del Norte, ubos sa pagdumala sa BFP Region IX.
Gipangunahan sa Regional Legal Service ubos ni FCINSP Genel H. Cagulada, Chief of Regional Legal Service, ang caravan aron mas masabtan sa mga personnel ang mga balaod, lagda, regulasyon ug polisiya nga direktang may kalabotan sa ilang mga katungdanan isip mga kawani sa serbisyo publiko.
Dili lamang paghatag og legal information ang tumong sa kalihokan, kundili gitugotan usab ang mga personnel nga makapangutana ug makapangayo og klaripikasyon kabahin sa mga legal nga isyu nga ilang maatubang sa pagpatuman sa ilang mga responsibilidad.
Matud sa BFP, importante ang ingon niini nga programa aron malikayan ang sayop nga paghubad o pagpatuman sa mga lagda ug aron masiguro nga ang serbisyo sa mga personahe magpabiling nakabase sa balaod, integridad ug accountability.
Gihatagan usab og gibug-aton sa kalihokan nga ang kahibalo sa balaod usa ka importante nga pundasyon sa propesyonal ug responsableng serbisyo, ilabina sa mga personnel nga nagdala og dagkong responsibilidad alang sa kaluwasan sa publiko.(MEDALYN U. BORJA)
Source: BFP R9 Dipolog City Fire Station