Malipayong gidawat sa kahugpungan sa mga mag-uuma ug mananagat sa upat ka barangay sa lungsod sa Katipunan, Zamboanga del Norte ang nagkalain-laing kahimanan sa pagpanguma ug panagat gikan sa kagamhanang-probinsyal pinaagi sa Office of the Provincial Agriculturist kon OPAG.
Sa gipahigayong Broiler Production Harvest Festival and Agri-Fishery Inputs Turn-over, karong adlawa, Nobyembre 12, 2024, gitunol ni Provincial Agriculturist Ms. Maybel Bustaliño ngadto sa nagkalain-laing kahugpungan sa mga mag-uuma ang nahisgutang agri-fishery inputs.
Ang San Antonio Fisherfolks Association sa pagpanguna ni Punong-Barangay Alma L. Jaictin, nakadawat ug usa ka pumpboat nga dunay 12 horse power nga makina, uban ang kagamitan sa panagat sama sa pukot, pataw ug mga pamato, ingon man lima ka jet-matic pumps nga mahimong alternatibong tinubdan sa tubig sa higayong mahitabo ang pagkapalong sa kuryente.
Ang Tuburan Farmers Association uban kang kapitan Danilo Jumawan nakadawat usab ug swine production inputs nga gilangkuban sa 4 ka baktin (weanling),6 ka sakong feeds, ug 2 ka latang bitamina. Ang Biniray Farmers Association, uban ni kapitan Bobby Eguia, nakadawat ug 3-ka latang liso sa kamatis, 2 ka sakong vermicast, 10 ka sakong organic fertilizer, 3 ka sakong foliar, 5 ka kartong foliar, 1-ka knapsack sprayer, 2 ka plastic drums, 2 ka pruning shears, 2 ka rake, 2 ka pala, 2 ka plastic mulch ug 50 ka seedling tray.
Ang Madasigon Singatong Farmers Association, nahatagan usab ug 1 ka latang liso sa talong, 2 ka sakong vermicast, 2 ka platic drums, 2 ka rake, 2 ka pruning shears,50 ka seedling tray,2 ka pala, 1 ka sakong urea fertilizer (46,0-0), Muriate of Potash (0-0-60), Grow More-(30-10-10) 1 ka kilo, nutrivant (0-46-30) ug 1 ka kilong Grow More (4-0-48). Ang Highlanders Farmers Association gihatagan ug 2 ka sakong vermicast, 2 ka sakong abono, ug 3 ka kartong foliar.
Samtang ang Dr. Rizal Farmers Association nakadawat ug bitamina ug bakuna alang sa ilang mga binuhing broiler. Ang Broiler Production Harvest Festival ug Agri-fishery Inputs Turn-over gitambungan ug gisaksihan ni kanhi Katipunan Mayor Patchito Eguia, Sangguniang Bayan members Rizer Tagbac ug Joren Eguia, Jun Lim ug kanhi SB member Jongjong Reynante.
Alayon niini,tagsa-tagsang mipasalamat kang Governor Rosalina “Nanay Nene” Jalosjos nga modagan pagka-mayor sa Dakbayan sa Dipolog ug kanhi Provincial Administrator Mr. Wilberth “Gaw Jojo” Magallanes nga modagan pagka-Bise Gobernador ang mga opisyales sa mga asosasyon ug mga kapitan sa nasangpit nga mga barangay sa paglusad sa ZNag program sa sayong bahin sa administrasyon ni Governor Nanay Nene Jalosjos. Dugang naghatag ug bulok sa selebrasyon mao ang “Lutong Bahay sa Kusina ni Nanay contest, diin ang migawas nga mananaog mao ang group no. 1 nga nakaangkon ug 1 ka libo ka pesos nga ganti, ikaduhang ganti mao ang group 5-600 pesos, ikatulong ganti,group 4- 400 pesos, ingon man ang group 2 ug 3 nakadawat ug tag 200 pesos isip consolation prize. Gisuportahan usab sa PROVET ang nasangpit nga festival pinaagi sa ice candy nga ginama sa gatas sa baka nga gihatag sa tanang nanambong sa selebrasyon. (Angelica T. Obina)
(Source: PIC-ATRuda)
Photographer: Jeffrey V. Lacay-Logistics: Rey Gonzales