Dipolog: Kagamhanang probinsyal miduyog sa pagsaulog sa 49th Nutrition Month ug National Disaster Resilience Month

Sa opisyal nga pagbukas sa nasangpit nga mga kalihokan, gihimo ang motorkada palibot sa dakbayan sa Dipolog nga gilangkuban sa mga kawani sa PDRRMO, PDRRMC, DTI, DAR, DILG, PSWDO, PHO, PROVET ug ang OPAg nga giila nga Most Colorful Nutria-Vehicle.

Paghidangat sa tanang misalmot sa motorkada sa Capitol Grounds, Estaka, adunay Nutrition Feeding Program – Lugaw ni Nanay Nene ug lamiang ice candy sa PROVET nga vitamin supplemental feeding nga gidalit alang sa tanan.

Sa nasayran nga ang OPAg mibaligya sa ilang talong, paliya, pipino, bisol, kalabasa, okra, repolyo, atsal, mangga ug uban pa sa hamubo lamang nga presyo nga dali usab nga nahurot tungod kay gidugokan kini sa mga pumapalit.

Ang PSWDO inubanan sa mga kawani sa TESDA nagpakita sa paghimo sa squash puto ug kamote juice kon udlot sa kamote nga gihimong juice.

Samtang ang PHO, pinaagi ni Nutrition Dietitian II Rosita R. Gonzales mipatin-aw ngadto sa mga nagmabdos ug nagpasuso, ang importansiya sa mga masustansya nga mokaon nga gikinahanglan aron mapalig-on ang resistensya ug mahilayo sa sakit sa panglawas.

Gikahibalo nga ang nasudnong pagsaulog sa ika-49 nga Nutrition Month, nag-promote sa pagpaila sa siguridad ug pagsustento sa pagkaon sa mga Pilipinhon nga nagdala sa tema nga “HEALTHY DIET affordable FOR ALL!”

Samtang ang National Disaster Resilience Month nagdala usab sa tema nga “BIDAng Pilipino: Building a Stronger Filipino Well-Being towards Disaster Resilience.”

(Source: Provincial Information Center ZaNorte Facebook Page)