Gibansay ang mga kababayen-an gikan sa Barangay Punta ug Sinaman, Dipolog City sa mga batakang kahanas sa digital technology pinaagi sa Basic Digital Literacy Training nga gipahigayon sa City Government of Dipolog.
Gipahigayon ang maong pagbansay pinaagi sa City Social Welfare and Development Office (CSWDO) Dipolog Tech4Ed Center, sa koordinasyon sa Department of Information and Communications Technology (DICT) Zamboanga del Norte, niadtong Agosto 24 sa DTC DICT ZN sa Barangay Biasong, Dipolog City.
Tumong niini nga mahatagan ang mga partisipante og praktikal nga kahibalo sa paggamit sa teknolohiya aron mas magamit nila kini sa ilang adlaw-adlaw nga panginahanglan, lakip ang pag-access sa impormasyon ug mga serbisyo.
Si DICT Zamboanga del Norte Project Development Officer II Al Vincent M. Recentes maoy facilitator ug resource speaker sa training, samtang mitambong usab si CSWDO Tech4Ed Center Manager Rosarie S. Batilong.
Kabahin usab kini sa padayong paningkamot sa City Government of Dipolog ug DICT sa pagpalapad sa digital literacy ug paghatag og mas accessible nga teknolohiya-edukasyon sa mga kababayen-an sa komunidad.(IKEN B. GULLEM)
Source: Dipolog City Government