Nahuman sulod lamang sa duha ka adlaw ang rehabilitasyon sa barangay road sa Purok 2 ug Purok 7, Barangay Lower Inuman, Sindangan pinaagi sa panagtambayayong sa Barangay Inuman ug Provincial Government of Zamboanga del Norte (PGZN).
Gikan Agosto 15 hangtod 16, gipahapsay ang maong dalan pinaagi sa pag-level, pagpatag ug pagbutang sa gikinahanglang aggregates ug uban pang materyales ug karon hingpit na kining magamit aron mas luwas ug mas sayon ang pag-agi sa mga residente.
Ang proyekto gitubag sa barangay ug PGZN human sa hangyo ni Barangay Chairman Allan E. Malunes alang sa pagpaayo sa dalan nga importante sa adlaw-adlaw nga pagbiyahe sa mga lumulupyo.
Gisalo usab sa Barangay Inuman ang fuel ug labor expenses, samtang gisuportahan sa PGZN ang aggregates, technical assistance ug engineering works alang sa rehabilitasyon.
Gilauman nga ang mas maayong kahimtang sa dalan makatabang sa mas paspas nga pagbiyahe sa mga residente, pagdala sa mga produkto gikan sa uma ngadto sa merkado, ug pag-access sa mga serbisyo.
Gipakita sa proyekto nga pinaagi sa pagtinabangay sa barangay ug probinsyal nga panggamhanan, mas dali matubag ang mga imprastraktura nga direktang gikinahanglan sa komunidad.(IKEN B. GULLEM)
Source: Zamboanga del Norte Provincial News Network