Nakadawat og food assistance ang 215 ka motorcab drivers sa dakbayan sa Dapitan samtang gipahinumdoman sa lokal nga kagamhanan ang hugot nga pagsunod sa mga regulasyon sa transportasyon.
Gipangunahan ni Mayor Evelyn “Belen” T. Uy ang pag-apod-apod sa ayuda sa Government Center, diin matag benepisyaryo nakadawat og bugas ug noodles isip tabang sa nagkataas nga gasto sa gasolina.
Gilangkuban ang mga drayber sa Dapitan City Motorcab Driver Operators Association (DCMDOA) ug Shrine Dapitan Drivers (SDD), nga dungan usab nagparehistro sa programang YAKAP.
Samtang naghatag og suporta, gipahinumdom usab ni City Councilor John Cadrick Empeynado ang mga drayber sa pagsunod sa bag-ong prangkisa, opisyal nga taripa, ug paggamit sa sticker aron malikayan ang kolorum ug overpricing.
Kini nga lakang kabahin sa paningkamot nga matabangan ang mga drayber samtang ginaseguro ang hapsay ug patas nga serbisyo sa publiko.(IKEN B. GULLEM)
Source: City Government of Dapitan