Padayon nga ginapalig-on sa lokal nga kagamhanan sa Dipolog ang kahibalo sa kababayen-an sa digital nga kalibutan pinaagi sa “Basic Digital Literacy for Women” nga gipahigayon niadtong Abril 28, 2026.
Gihimo ang maong pagbansay sa DICT Office sa Barangay Biasong, isip kabahin sa dugayng programa sa siyudad nga nagtumong sa paghatag og oportunidad sa kababayen-an nga makakat-on sa paggamit sa teknolohiya alang sa adlaw-adlaw nga panginabuhi ug komunikasyon.
Gipangulohan ang kalihokan sa City Social Welfare and Development Office (CSWDO) ug sa Dipolog Tech4Ed Center, uban ang kooperasyon sa DICT Zamboanga del Norte ug sa lokal nga panggamhanan sa Barangay Miputak.
Samtang, si Al Vincent M. Recentes gikan sa DICT Zamboanga del Norte maoy nagsilbing resource speaker, diin iyang gipaambit ang mga batakang kahibalo sa digital tools ug responsableng paggamit sa internet. Mitambong usab si Rosarie S. Batilong, manager sa CSWDO Tech4Ed Center.
Nagpadayon ang maong inisyatiba isip kabahin sa tumong sa syudad nga mahimong mas inklusibo ug digitally empowered ang komunidad.(IKEN B. GULLEM)
Source: Dipolog City Government