Dapitan City – Gisugdan sa Jose Rizal Memorial State University ang Film Appreciation and Film Viewing Activity for Children sa CNAHS Audio-Visual Hall sa JRMSU Main Campus, nga nagtumong sa pagpalalom sa kahibalo sa kabataan sa arte sa pelikula.
Nagpangulo sa sesyon si Bon Labora, usa ka award-winning filmmaker ug educator, nga naghatag og leksyon sa batakang konsepto sa filmmaking ug visual storytelling. Gidasig niya ang mga estudyante nga dili lamang mahimong manan-aw kondili mahimong mamumuo sa kaugalingong mga istorya.
Mitambong sa kalihokan ang mga estudyante gikan sa Jose Rizal Memorial State University ug nagkalain-laing eskwelahan ilalom sa Department of Education Dapitan Schools Division aron magkat-on ug magpalambo sa ilang kahanas sa pagtan-aw ug pagsabot sa pelikula.
Tumong sa maong inisyatiba nga mapukaw ang pagkamamugnaon, kritikal nga panghunahuna, ug pag-apresyar sa visual storytelling sa kabatan-onan isip pag-andam sa umaabot nga mga filmmaker ug storyteller sa Dapitan.(JENIFFER JR. DELICA)
Source: City Government of Dapitan