DIPOLOG: JRMSU- DIPOLOG USA SA MGA TESTING CENTER SA PMA ENTRANCE EXAM 2026

Duol na sa ilang damgo nga makasulod sa Philippine Military Academy (PMA) ang mga kabatan-onan sa Zamboanga del Norte ug kasikbit nga mga probinsya human napili ang Jose Rizal Memorial State University (JRMSU)-Dipolog Campus isip usa sa mga testing center alang sa PMA Entrance Examination (PMAEE) 2026.

Ipahigayon ang eksaminasyon sa Hulyo 25 ug 26, dungan sa ubang testing centers sa Western Mindanao ug General Santos City. Gawas sa Dipolog City, mahimo usab nga magkuha sa PMAEE sa Iligan City, Kabacan, Cotabato City, Tacurong City, Zamboanga City, Pagadian City, Basilan, ug General Santos City.

Samtang, gikinahanglan nga motambong ang mga aplikante alas-7:00 sa buntag alang sa processing, samtang alas-12:00 sa udto magsugod ang eksaminasyon. Gikinahanglan usab nga magsul-ob og puti nga t-shirt, taas nga pantalon, ug closed shoes, ug magdala sa valid ID, bag-ong ID pictures, ug No. 2 pencil.

Kini nga PMAEE mao ang unang hugna sa pagpili sa mga gustong mahimong kadete sa PMA. Ang mga makapasar sa tanang screening adunay higayon nga makadawat og military ug academic training ug mahimong opisyal sa Armed Forces of the Philippines.

Giawhag sa PMA ang mga kwalipikadong kabatan-onan nga pahimuslan ang maong higayon aron matuman ang ilang pangandoy nga makaalagad sa nasud pinaagi sa serbisyo militar.(IKEN B. GULLEM)

Source: Zamboanga del Norte Provincial News Network