Gipahigayon sa Department of Agrarian Reform (DAR) Zamboanga del Norte ang revalidation sa tulo ka prayoridad nga Pang-Agraryong Tulay para sa Bagong Bayanihan ng mga Magsasaka (PBBM) sa lungsod sa Labason aron masiguro ang kahanduman sa mga proyekto alang sa sunod nga hugna sa implementasyon.
Gipangulohan ni Provincial Agrarian Reform Program Officer II Daisy Dell Suan Digamon ang pagrepaso sa Upper La Union–Gabu Bridge, Sitio Diangos Bridge, ug Liboto Bridge. Gisusi sa grupo ang kahimtang sa matag lokasyon aron mapamatud-an ang kaangayan sa mga proyekto ug mapalig-on ang konektibidad sa mga komunidad sa kabanikanhan.
Miatubang usab sa maong revalidation sila ABC President Hon. Anna Lisa A. Josua, Barangay Captain Hon. Samson H. Alipan, mga lokal nga opisyal, mga kawani sa Municipal Engineering Office, ug mga personnel sa DARMO Labason isip kabahin sa hiniusang pag-assess sa mga proyekto.
Gilauman sa DAR nga ang pagkompleto sa tulo ka agrarian bridges makahatag og mas luwas ug mas kasaligan nga agianan alang sa mga residente ug mag-uuma. Makatabang usab kini sa pagpaspas sa pagdala sa mga produktong pang-agrikultura ngadto sa merkado ug sa pagpalig-on sa ekonomiya sa Labason.(IKEN B. GULLEM)
Source: Zamboanga del Norte Provincial News Network