Malipayon ug mapasalamaton ang mga Job Order (JO) workers sa Munisipyo sa Sergio Osmeña human sa unang higayon nga ilang pagdawat og pinansyal nga tabang gikan sa lokal nga kagamhanan.
Ang matag kwalipikadong JO nga nakapag-render og trabaho sulod sa tulo ka bulan ug aktibo gihapon sa serbisyo nakadawat og P5,000 nga financial assistance.
Sumala sa opisyal nga pahibalo, adunay usab mga JO workers nga nakadawat og P4,000, P3,000, ug P2,000, base sa gidugayon sa ilang serbisyo ug sa ilang kahimtangan sa trabaho sa panahon sa paghatag sa tabang. Kini nga programa gitumong sa paghatag og dugang nga suporta ug pag-ila sa ilang kontribusyon sa operasyon sa lokal nga gobyerno.
Gihulagway sa mga benepisyaryo ang maong tabang isip dakong ganti ug pasidungog sa ilang dedikasyon ug matinud-anong pag-alagad sa katawhan.
Dako usab ang ilang pagpasalamat kang Municipal Mayor Hon. Glen N. Yu, uban sa padayon nga suporta ni Vice Mayor Ciddycriz C. Villamin ug sa mga Sangguniang Bayan (SB) Members, nga nagtinabangay sa pagpatuman sa maong inisyatibo.
Matod pa sa lokal nga pangulohan, ang maong financial assistance usa ka pamaagi sa pagpakita og pagtagad ug pagpasalamat sa mga JO workers nga maoy hinungdan sa hapsay ug lig-on nga pagdagan sa mga serbisyo sa munisipyo.(IKEN B. GULLEM)
Source: Municipality of Sergio Osmeña