Gihimong hingpit na ang panagtambayayongay alang sa paglusad sa “Information Service Delivery Network” (ISDN) dinhi sa dakbayan tali na sa kagamhanang lokal sa Dipolog uban sa mga giilang “partners” niini, pinaagi sa pagpahigayon sa pormal nga pagpirmahanay sa “Memorandum of Understanding” (MOU), Agosto 26, 2022, didto sa Ground Floor, Museo Dipolog ning siyudad.
Ang kalihokan gipangunahan nila ni City Mayor Darel Dexter T. Uy ug POPCOM Regional Director, Mr. Jeff Y. Fuentes, uban sa pipila ka mga lokal ug nasudnong buhatan nga giilang partner agencies, ilawom sa ISDN.
Usa ka hamubong programa ang gipahigayon diin mipabati sa ilang mga mensahe sila si POPCOM Regional Director Jeff Y. Fuentes ug City Mayor Darel Dexter T. Uy.
Sa mensahe nga gipabati ni Dir. Fuentes, kini ang mingon nganiining adlawa, maoy usa ka importanteng adlaw alang sa dakbayan sa Dipolog tungod sa gipakitang bug-os ug sinserong suporta niini dinha sa paglusad sa ISDN sa siyudad nga programa alang sa pagpalambo sa mga kabatan-onan.
Samtang sa mensahe ni Mayor Uy, kini ang nagpasalamat usab ngadto sa mga ISDN partners sa pagpahigayon sa MOU Signing. Lakip partikular sa gipasalamatan sa Mayor mao ang rehiyonal nga buhatan sa POPCOM ug Zuellig Family Foundation Inc. (ZFFI) tungod sa paningkamot niini nga ma-enroll ang dakbayan ngadto sa programang “The Challenge Initiative”(TCI), nga partikular nga nagatutok sa “Teenage Pregnancy”.
(Source: Dipolog City Government Facebook page)
