Naghiusa ang kapulisan ug mga pwersa sa kasundalohan sa usa ka information drive nga gihimo sa Barangay Pedagan, Sergio Osmeña Zamboanga del Norte, aron mapalig-on ang kahibalo sa katawhan bahin sa kalinaw, kahusay ug kaluwasan sa komunidad.
Gipangunahan ang kalihokan sa Sergio Osmeña Municipal Police Station ubos sa pamuno ni PCPT Larry E. Tumanda, kauban si PCpl Jenevib L. Sumambod sa WCPD, PCpl Mark Neil Labidon sa 901st RMFB9, PCpl Alemar Randez sa 3rd FOB, 1st ZNPMFC, ug MSgt. Sulpicio Ansao sa Delta Company, 97th Infantry Battalion.
Tumong sa maong aktibidad ang paghatag og klaro ug sayon sabton nga impormasyon sa mga residente bahin sa mga balaod ug programa nga may kalabotan sa kaluwasan sa komunidad.
Atol sa mga lektyur ug diskusyon, gihisgutan ang Anti-Terrorism Campaign aron mapukaw ang kahandurawan ug pagbantay sa katawhan batok sa posibleng hulga. Gipatin-aw usab ang Republic Act 9262 o Anti-Violence Against Women and Their Children Act, diin gihatagan og gibug-aton ang katungod ug proteksyon sa kababayen-an ug kabataan. Lakip usab sa mga topiko ang Republic Act 9165 o Comprehensive Dangerous Drugs Act of 2002, nga nagtumong sa paglikay ug pagsumpo sa ilegal nga droga sa komunidad.
Sumala sa kapulisan, ang maong information drive usa ka paagi aron mas maila sa katawhan ang ilang papel sa pagmintinar sa kalinaw ug kahusay.(IKEN B. GULLEM)
Source: Sergio Osmeña Municipal Police Station ZNPPO