Nagmalampuson ang gipahigayon nga Professional Regulation Commission (PRC) Mobile Service sa Zamboanga del Norte Convention and Sports Center, diin sulod sa duha ka adlaw gikan Enero 16-17, 2026 daghang propesyonal ang nakabenepisyo sa nagkadaiyang serbisyo nga gitanyag.
Gihatagan og kahigayunan ang mga mitambong sa aplikasyon sa eksaminasyon, pag-renew sa Professional ID Card, pag-authenticate ug pag-certify sa mga dokumento, ug pag-retrieve sa LERIS account, nga nakapahapsay sa ilang mga transaksiyon sa PRC.
Kini nga kalihokan gisuportahan sa lokal nga pangagamhanan ubos sa pagpanguna ni Mayor Roberto Y. Uy ug Governor Darel Dexter T. Uy, nga nagtumong sa pagdala sa serbisyo sa PRC duol sa katawhan, ilabi na sa mga propesyonal gikan sa kasikbit nga mga lugar.
Tungod sa hapsay ug paspas nga pagproseso sa PRC personnel ug lokal nga mga kawani, daghang mga propesyonal ang nagpahayag og pagpasalamat sa dakong tabang ug kasayon nga ilang nabatonan gikan sa maong mobile service.(IKEN B. GULLEM)
Source: Zamboanga del Norte Provincial News Network