Miresponde dayon ang Emergency Medical Services personnel sa Labason Municipal Fire Station sa usa ka emerhensiyang pagpanganak sa Barangay Bobongan, Labason, Zamboanga del Norte niadtong nilabay nga adlaw aron tabangan ang usa ka 25-anyos nga inahan.
Pag-abot sa mga responder, nahibal-an nilang natawo na ang bata sa wala pa sila miabot. Nakit-an nila nga normal ang pagginhawa sa bag-ong natawo ug kusog ang iyang paghilak, apan wala pa mogawas ang inunlan sa inahan. Dihadiha gisusi sa EMS team ang kahimtang sa inahan ug sa bata, gibantayan ang posibleng pagdugo sa inahan, samtang gipauga ug gipainitan ang bag-ong natawo aron mapadayon ang iyang maayong kondisyon.
Human sa inisyal nga pag-atiman, luwas nga gidala sa EMS ang inahan ug ang iyang bag-ong natawo nga anak ngadto sa Labason District Hospital alang sa dugang nga pag-atiman ug eksaminasyon.
Padayon nga gipakita sa Labason Municipal Fire Station ang ilang kaandam sa paghatag og paspas ug episyenteng emergency medical response aron masiguro ang kaluwasan sa komunidad.(JENIFFER JR. DELICA)
Source: BFP R9 Labason Fire Station