Dako ang pasalamat sa usa ka inahan ngadto sa healthcare support program sa Provincial Government of Zamboanga del Norte human matabangan ang iyang nuybe anyos nga anak nga nag-antos og congenital heart disease nga adunay pulmonary stenosis.
Sumala ni Grace Balwit, inahan sa benipisyaryo, residente sa Lower Irasan, Roxas, dugay nang naglisod og ginhawa ang bata ug dali kapuyon, hinungdan sa ilang pagkabalaka. Human masusi sa mga doktor sa Dakbayan sa Dumaguete sa miaging tuig, napamatud-an ang diperensya sa kasingkasing nga nagkinahanglan og espesyalistang pag-atiman.
Pinaagi sa koordinasyon sa Zamboanga del Norte Medical Center (ZNMC), nahikay ang referral sa bata paingon sa Sugbo kauban ang ubang mga pasyente alang sa dugang nga eksaminasyon aron mahibaw-an kon operahan ba o tambalan pinaagi sa maintenance nga medisina.
Samtang, gipahayag ni Balwit ang dako niyang kahupayan ug paglaum nga pinaagi sa maong suporta, masiguro ang kahimsog sa iyang anak ug malikayan ang posibleng komplikasyon sa umaabot.(IKEN B. GULLEM)
Source: Zamboanga del Norte Provincial News Network