Malamposong gipahigayon kagahapon, Nobyembre 30, 2022 sa may alas 8:00 ang takna didto sa Museo Dipolog ang ika “159th Andres Bonifacio Day ilawom sa pagpasiugda sa kagamhanang lokal ning siyudad.
Nanguna sa programa sila si City Mayor Darel Dexter T. Uy ug City Vice Mayor Senen O. Angeles, uban sa presensiya nila ni City DILG CLGOO Sherrie Charlota N. Machutes, konsehal Marilou Calibo ug konsehal Mandel Zoe Lugasan duyog sa presensiya usab sa mga hepe sa nagkalain-laing buhatan sa City Government ug mga uniformed personnel gikan sa PNP, BJMP, BFP, Philippine Coast Guard, CDRRMO, Traffic Managemenet Office ug SCAA, tanan ning dakbayan.
Mibolok sa maong programa ang “wreath-laying ceremony” ngadto sa imahe ni Gat Andres Bonifacio nga gipangunahan nila ni Mayor Uy ug Vice Mayor Angeles, uban sa mga kawani sa dakbayan.
Atol sa pagpabati sa hamubong mensahe ni Mayor Uy, iyang gisaysay ang tipik sa atong kasaysayan panahon ni Gat Andres Bonifacio, dinha sa iyang pagpakigbisog alang sa pagkab-ot sa atong kagawasan, sa iyang gihimong mga pagpakig-away aron lamang sa pag-angkon sa maong kagawasan.
Sumala pa, nga angay lang natong paga-handumom ang atong kasaysayan gumikan kay tipik kitang tanan niini, diin padayon natong gipahimuslan ang kagawasan hangtud karon.
Pormal nga gitapos ang hamubong programa pinaagi sa Closing Remarks nga gipabati ni Vice Mayor Angeles nga gisundan sa “Photo Ops”, isip handumanan sa maong okasyon.
Subay niini, mipaabot sa ilang kinasing-kasing nga pasalamat sila si Mayor Uy ug Vice Mayor Angeles ngadto sa tanang miduyog sa maong kasaulogan pinaagi sa linawas nga pagtambong niini, bisan pa man sa diyotay nga pagtaligsik sa ulan.
(Source: Dipolog City Government Facebook page)