Mas lig-on nga koordinasyon, mas abot-kamay nga serbisyo. Mao kini ang tumong sa gipahigayong Monitoring and Coordination Meeting sa Department of Health–Zamboanga Peninsula Center for Health Development (DOH ZP-CHD) pinaagi sa National HIV, AIDS, and STI Prevention and Control Program (NASPCP), uban sa Provincial Health Office of Zamboanga del Norte.
Atol sa panagtigom, gisusi ang kahimtang sa implementasyon sa HIV program sa probinsya, lakip ang mga kalampusan, bag-ong update, ug mga concern nga nagkinahanglan og aksyon. Gihatagan usab og gibug-aton ang pagpalig-on sa koordinasyon aron masiguro ang kalidad ug accessibility sa mga serbisyo alang sa HIV.
Usa sa mahinungdanong update mao ang recertification sa Corazon C. Aquino Hospital (CCAH) isip certified HIV Treatment Hub. Ang CCAH mao ang bugtong HIV Treatment Hub sa Zamboanga del Norte, nga naghatag og importanteng serbisyo alang sa HIV treatment ug care sa probinsya.
Dili lamang kahibalo ug pagmonitor ang tumong sa maong panagtigom, kondili ang pagpalig-on usab sa panag-uban sa mga health workers ug partner agencies aron mas dali ug mas tukma nga matubag ang panginahanglan sa mga komunidad.
Pinaagi sa padayong koordinasyon tali sa DOH ZP-CHD ug IPHO Zamboanga del Norte, gitinguha nga walay mapakyas sa pag-access sa gikinahanglang HIV services—usa ka lakang padulong sa mas responsive, inclusive, ug lig-on nga serbisyo panglawas sa probinsya.(IKEN B. GULLEM)
Source: DOH Zamboanga Peninsula CHD