Napulog siyam (19) ka TUPAD beneficiaries gikan sa Local Government Unit (LGU) sa Kalawit, Zamboanga del Norte ang malampusong nakahuman sa 15 ka adlaw nga Masonry NC I training, nga nagtumong sa paghatag kanila og dugang nga teknikal nga kahibalo ug kahanas alang sa mas maayong oportunidad sa trabaho.
Kabahin kini sa padayong paningkamot sa Department of Labor and Employment (DOLE) nga mapalambo ang kahanas ug employability sa mga Filipino worker ug beneficiaries pinaagi sa mga programa nga makatabang kanila sa pagpangita og desente ug malungtarong panginabuhian.
Atol sa monitoring activity, gipahayag ni Kalawit Mayor Hon. Arcel C. Antojado ang iyang pagpasalamat sa maong training nga gihatag ngadto sa iyang mga kasimanwa. Matod niya, ang paghatag og technical-vocational skills sa mga TUPAD beneficiaries makatabang aron mas mudaghan ang ilang oportunidad nga makakuha og desente nga trabaho ug mapaayo ang ilang panginabuhian.
Kini nga skills training resulta sa DOLE-TESDA partnership nga gipasiugdahan ni DOLE Provincial Head Elamsalih E. Ungad ug TESDA Provincial Director Adrian B. Ampong, uban sa koordinasyon sa Community Training and Employment Coordinators (CTECs).
Tumong sa maong partnership nga dugangan ang temporaryong employment assistance nga gihatag pinaagi sa TUPAD pinaagi sa skills development nga magamit sa mga beneficiaries bisan human na sila sa programa.
Gipasiugda ang maong training pinaagi sa koordinasyon ni PESO Manager Dolores Cadil, nga nakigtambayayong sa mga concerned partners aron masiguro ang malampusong pagpahigayon sa skills training.
Nagpakita ang inisyatiba sa padayong paningkamot sa DOLE-RO9, ubos sa pagpangulo ni Regional Director Albert E. Gutib, aron masiguro nga ang mga TUPAD beneficiaries dili lamang makadawat og temporaryong trabaho, kondili mahatagan usab og mga oportunidad alang sa skills development nga mahimong dalan ngadto sa malungtarong trabaho ug panginabuhian.(IKEN B. GULLEM)
Source: DOLE Liloy Satellite Office