Gihisgutan sa usa ka Public Hearing ang proposed amendment sa Traffic Ordinance sa Dakbayan sa Dipolog, ilabina ang probisyon bahin sa truck ban nga direktang makaapekto sa mga delivery trucks nga mosulod sa sentro sa siyudad.
Gipahigayon ang maong hearing alas 2:00 sa hapon sa Session Hall sa Sangguniang Panlungsod niadtong Setyembre 3,ug gitambongan sa mga representante gikan sa business sector, suppliers, logistics forwarders, ug uban pang stakeholders.
Gipangunahan ni Konsehal Harrison T. Young, Chairman sa Committee on Energy, Transportation, Communication and Other Public Utilities sa Sangguniang Panlungsod, ang maong kalihokan, uban sa pagdumala ni Konsehal Raul C. Barbaso sa diskusyon ug pagpasabot sa proposed amendment sa Section 23, Article XXII sa Traffic Ordinance.
Pangunang punto sa pag-amendar ang pagtakda sa oras sa pag-deliver sa mga produkto sulod sa sentro sa dakbayan, isip lakang aron mapadali ang dagan sa trapiko ug maminusan ang paghuot nga kasagarang hinungdan sa dagkong delivery ug cargo trucks.
Ubos sa gisugyot nga amendment, ang mga delivery trucks nga mosulod sa gitugot nga physical dimension o gidak-on mahimong maghatod og mga produkto sa sentro sa siyudad gikan alas 6:00 sa buntag hangtod alas 7:00 sa gabii.
Apan ang mga dagkong delivery ug cargo trucks nga molapas sa gitugot nga physical dimension, sama sa 10-wheeler trucks, dili tugotan nga mag-deliver sulod sa maong oras. Mahimo silang mosulod ug magpadayon sa ilang delivery operations alas 7:00 sa gabii pataas.
Gipadayag usab sa mga stakeholders ang ilang mga concern, obserbasyon ug sugyot kabahin sa proposed amendment. Sa diskusyon, gipakita sa mga representante sa business sector ang ilang suporta sa maong lakang, ilabina sa tumong niini nga mapahapsay ang trapiko nga dili usab mapasagdan ang panginahanglan sa mga negosyo.
Ang mga suhestiyon ug concern nga napadayag atol sa Public Hearing pagatagdon sa Sangguniang Panlungsod isip kabahin sa dugang nga deliberasyon sa dili pa ang pinal nga pag-apruba ug pagpatuman sa amendadong probisyon.(IKEN B. GULLEM)
Source: Dipolog City Government