Gisugdan karong semanaha ang pagpang-apod-apod sa “Handog Pamasko sa Barangay” sa kagamhanang lokal sa Dipolog pinaagi sa City Social Welfare and Development Office.
Si Mayor Darel Dexter T. Uy kinsa maoy nangulo sa pagpanghatag sa nasangpit nga pinaskohan ngadto sa mga residente sa mga barangay sa Cogon ug San Jose ang malipayong nagpasalamat sa mga lumulupyo sa ilang padayon nga pagsuporta sa mga programa sa siyudad.
Didto sa Brgy. San Jose, gipakita sa mga lumulopyo ang ilang kalipay ug pagpasalamat pinaagi sa pagdaygon ngadto ni Mayor Uy nga gikahimot-an sa naulahi.
Lakip sa mga nakadawat og mga pinaskohan mao ang mga barangay sa Sinaman diin ang pagpanghatag gipangunahan ni konsehal Roger Asprer, Sangkol nga gitambongan ni konsehal Marilou Calibo, Lugdungan uban ni konsehal James Verduguez ug Diwan uban usab ni konsehal Roseller “Matoy” Barinaga samtang una nang nakadawat ang Brgy. Estaka, gisundan sa mga barangay sa Barra, Biasong ug Central.
Nasayran nga ang mga pinaskohan gilangkoban sa 5 ka kilo nga bugas, 1 ka kilo nga bihon, 5 ka lata nga sardinas ug 3 ka lata nga corned beef.
(Source: Dipolog City Government Facebook page)