Gidugok sa bagang duot sa katawhan sa lungsod sa Gutalac ang Gugma-Ayuda ni Nanay Nene Outreach Program, sa pagpangulo ni former Mayor Mariano ‘Nonoy’ Candelaria, nga gipahigayon atol sa pista sa patron San Isidore Parish, sa Covered Court Pob. Gutalac, Zamboanga del Norte, Mayo 17 niining tuiga.
Ang lungsod sa Gutalac adunay 33 ka mga barangay, diin 29 niini maoy naka-benepisyo sa Gugma-Ayuda ni Nanay Nene, nga malipayong nakadawat sa klase-klasing ayuda gikan sa probinsya.
Gitunol sa buhatan sa PSWD, ang 7,000 ka sako sa tag 5-kilo nga bugas, ug liboan ka indibidwal ang nakakaon sa init nga champorado, sa pagpaningkamot ni Assistant PSWDO Alex Sabal, Mr. Jervis P. Jalosjos ug mga kauban.
Gitunol usab sa Provincial Veterinarian ang 152 ka sachets sa vitamins, 109 ka botelya (alvendasol) nga pang-purga sa hayop, ug 100 pcs nga ice candy.
Samtang giapod-apod usab sa Office of the Provincial Agriculture (OPAg) ang 500 ka assorted vegetable seedlings, 1,000 ka putos nga organic og inorganic fertilizer, ug 500 packs nga corn seeds.
Nasayran gikan ni Mr. Rommel Jamolod nga nakapahimulos usab ang 787 ka indibidwal sa medical consultations, pinaagi sa mga kawani sa Provincial Health Office (PHO), inabagan sa Liloy Integrated Health District Hospital ug Labason District Hospital, diin 621 niini ang libreng na konsulta ug nakadawat sa mga libreng tambal, 122 ang naibtan sa ngipon, ug 44 ang natuli.
Ingon man adunay 48 ka mga lalaki bata, hamtong ug tigulang ang na -alotan sa ilang buhok pinaagi sa mga personahe sa PDRRMO ug ZNPPO.
(Source: Provincial Information Center ZaNorte Facebook page)