Mibisita sa buhatan ni Gov. Darel Dexter Uy ang mga opisyales sa Girl Scouts of the Philippines gikan sa Western Mindanao Region isip kabahin sa ilang koordinasyon ug pakigpulong sa lokal nga liderato sa Zamboanga del Norte, kaniadtong Marso 12, 2026.
Tumong sa pagbisita aron mapalig-on ang koordinasyon sa mga programa sa scouting ug mapadayon ang mga inisyatiba nga nagpalambo sa liderato, disiplina, ug serbisyo sa kabatan-onan sa rehiyon.
Gipangulohan ang delegasyon ni National President Cristina Lim-Yuson, kauban si GSP Regional Chairperson Dapitan Mayor Evelyn T. Uy, National Executive Director Roselyn B. Davadilla, ug Regional Executive Director Rizalina D. Alemania.
Apil usab sa delegasyon ang mga Council Presidents ug Council Executives gikan sa nagkalain-laing lokal nga konseho sa Western Mindanao, lakip ang Basilan, Cotabato City, Iligan City, Lanao del Norte, Maguindanao, North Cotabato, Sultan Kudarat, Sulu, Zamboanga City, Zamboanga del Norte, ug Zamboanga del Sur.
Samtang, dako ang pasalamat ni Gov. Uy ngadto sa organisasyon sa ilang padayon nga dedikasyon sa paghulma sa kabatan-onan dili lamang sa Zamboanga del Norte kondili sa tibuok Mindanao pinaagi sa mga programa sa Girl Scouts of the Philippines.(IKEN B. GULLEM)
Source: Gov Darel Uy