Gi-assess sa Dipolog City Government ang implementasyon sa mga programa sa nutrisyon sa 21 ka barangay sa siyudad pinaagi sa tulo ka adlaw nga table assessment ubos sa Monitoring and Evaluation of Local Level Plan Implementation Protocol o MELLPI Pro.
Kini nga kalihokan gipahigayon sa City Nutrition Office of Dipolog ug gilangkuban sa 30 ka Barangay Nutrition Scholars (BNS) nga nagserbisyo sa nagkalain-laing barangay sa siyudad.
Tumong sa assessment nga masuta ug mapalig-on pa ang pagpatuman sa mga programa sa nutrisyon sa lebel sa barangay aron mas mapauswag ang kahimtang sa nutrisyon sa mga komunidad.
Samtang, ang evaluasyon gipangulohan sa City Nutrition Evaluation Team nga gilangkuban sa mga representante gikan sa City Health Office of Dipolog, Department of Health Provincial Office, City Agriculture Office of Dipolog, City Social Welfare and Development Office ug sa Department of Education Dipolog City Schools Division.
Pinaagi sa maong assessment, girepaso sa matag barangay ug sa mga BNS ang ilang mga programa, lakip ang mga lakang ug interbensyon batok sa malnutrisyon, aron masiguro nga epektibo ug padayon nga napalambo ang mga serbisyo sa nutrisyon sa tibuok siyudad.(IKEN B. GULLEM)
Source: Dipolog City Government