Usa ka timaan sa pagsugod sa bag-ong proyekto sa imprastraktura ang gipahigayon nga Groundbreaking Ceremony alang sa concreting sa Barangay Road sa Purok 2, Barangay Rizalina, Zamboanga del Norte.
Gipangulohan ang maong seremonya ni Barangay Captain Hon. Robert Laurente, uban sa mga Barangay Officials sa Rizalina. Mitambong usab si Municipal Mayor Hon. Marissa D. Manigsaca, kauban ang mga miyembro sa Sangguniang Bayan nga sila Hon. Robert Poculan ug Hon. Moody Palubon, ingon man ang mga municipal department heads ug mga opisyal.
Ang groundbreaking nagtimaan sa opisyal nga pagsugod sa proyekto nga gitumong sa pagpaayo sa kahimtang sa barangay road ug paghatag og mas maayong access ug konektibidad sa mga residente sa Purok 2.
Gipondohan ang maong proyekto ubos sa Local Government Support Fund – Growth Equity Fund (LGSF-GEF) sa National Government, isip suporta sa pagpatuman sa mga prayoridad nga proyekto sa imprastraktura sa mga lokal nga pangagamhanan.
Sa pagkahuman sa proyekto, gilauman nga mas mapaayo ang pagbiyahe sa mga residente ug ang pagdala sa mga produkto sa agrikultura. Makatampo usab kini sa pagpalambo sa lokal nga ekonomiya ug sa kinatibuk-ang kalamboan sa komunidad.
Ang maong seremonya nagpakita sa padayong paningkamot sa lokal nga pangagamhanan ug sa mga kauban niini sa pagpatuman sa mga proyekto nga adunay direktang kaayohan alang sa katawhan sa Barangay Rizalina.(IKEN B. GULLEM)
Source: Municipality of Rizal