Gipakusgan sa City Government of Dapitan ang mga lakang alang sa pagpanalipod sa mud crab ug pagsiguro sa padayon nga suplay niini pinaagi sa paghiusa sa mga lokal nga mangingisda, barangay officials ug ubang stakeholder.
Pinaagi sa City Agriculture Office, gipahigayon niadtong Agosto 11 ang stakeholders’ meeting alang sa Mudcrab Production and Protection Program sa City Government Amphitheater.
Gipunting sa programa ang responsable ug malungtarong pagdumala sa mud crab resources aron mapadayon ang natural nga pagpanganak sa alimango ug malikayan ang pagkunhod sa ilang populasyon. Kini nahiuyon sa Dapitan City Council Resolution No. 2013-157-A, nga nag-ila sa mud crab isip opisyal nga simbolikong produkto sa siyudad.
Partikular nga gihatagan og pagtagad ang pagpanalipod sa berried crabs, o mga alimango nga adunay mga itlog. Gidasig ang mga crab catcher nga dili dakpon ang mga kini ug ibalik sa dagat o sa ilang natural nga habitat aron makapadayon sa pagpanganak.
Gipasiugda ni Mayor Evelyn “Belen” T. Uy nga aktibong gipatuman sa LGU ang maong conservation effort. Matud niya, nagsugod na ang siyudad sa pag-release sa mga berried crabs balik sa ilang natural nga pinuy-anan ug giawhag ang mga mangingisda nga buhaton usab kini.
Gipangulohan ni City Agriculturist Cyril Patangan ang stakeholders’ meeting, uban sila Sangguniang Panlungsod Committee on Agriculture Chairperson Dennis A. Tan ug CFARMC Chairman Medardo P. Gonzales isip co-facilitators.
Aktibong mitambong ang mga fisherfolk, barangay captains ug barangay councilors sa diskusyon bahin sa produksiyon, conservation ug responsableng pag-ani sa mud crab.(IKEN B. GULLEM)
Source: Dapitan City Government