Tungod sa dali nga pagreport sa usa ka lokal nga mangingisda, luwas nga napagawas balik sa kadagatan ang usa ka babayeng Green Sea Turtle (Chelonia mydas) human kini masangit sa pukot sa Barangay Siparok, Jose Dalman, Zamboanga del Norte.
Si Malse Balase, lokal nga residente, ang unang nakamatikod sa pawikan nga nasangit sa pukot ug dayon kining gitaho sa Community Environment and Natural Resources Office (CENRO) Manukan. Dihadiha mitubag ang mga technical personnel nga gipangulohan ni Coastal Resources Management Unit (CRMU) Chief Jim V. Montejar aron susihon ang kahimtang sa maong marine turtle.
Nasuta nga ang pawikan adunay 70 sentimetro nga carapace length ug 64 sentimetro nga carapace width, ug walay nakita nga samad o uban pang pisikal nga kadaot. Human sa standard monitoring procedures, gibutngan kini og tags nga PH0543K sa wala ug PH0544K sa tuo nga flipper sa dili pa luwas nga gipagawas balik sa kadagatan sa maong adlaw.
Samtang gidayeg sa CENRO Manukan ang responsableng lihok sa residente sa dali nga pagreport sa insidente ug gihangyo ang mga komunidad sa kabaybayonan nga ipadayon ang pagpanalipod sa marine wildlife pinaagi sa paglikay sa pagdakop o pagdaot niini ug pagreport dayon sa DENR o lokal nga awtoridad kung adunay susamang hitabo.(IKEN B. GULLEM)
Source: DENR Zamboanga Peninsula