Aron dili malangan ang paghatag og mga titulo sa yuta ngadto sa mga Agrarian Reform Beneficiaries (ARBs), girepaso sa Department of Agrarian Reform (DAR) Zamboanga del Norte ang dagan sa implementasyon sa DAR-SPLIT Project ug gilatid ang mga lakang aron mapaspasan ang pagpatuman niini sa nahibiling bahin sa tuig.
Gipangulohan ni Provincial Agrarian Reform Program Officer II Daisy Dell Suan Digamon ang Provincial Mid-Year Sectoral Formative Assessment ug 2nd Semester Catch-up Planning uban sa mga provincial ug municipal implementers sa DAR Provincial Office.
Gituki sa mga partisipante ang nahimo sa unang unom ka bulan sa tuig, lakip ang parcelization, field validation, dokumentasyon, ug pagproseso sa mga titulo sa yuta. Gihisgutan usab ang mga hagit nga nakaapekto sa implementasyon ug ang mga lakang aron mas mapalig-on ang koordinasyon uban sa mga partner agencies, lokal nga panggamhanan, ug mga ARBs.
Mitambong usab si PCAO Samuel Andrew A. Baliton, CPA, uban sa mga technical staff, field personnel, ug focal persons aron masiguro nga matuman ang mga target sa DAR-SPLIT Project alang sa 2026 ug mapadayon ang paghatag og episyente ug responsive nga serbisyo sa mga benepisyaryo.(IKEN B. GULLEM)
Source: DAR Zamboanga del Norte Province