Gipadayag ni Governor Darel Dexter T. Uy sa Zamboanga del Norte ang iyang kusganong pagsuporta sa Classroom Acceleration Program Bill nga gisang-at ni Senador Bam Aquino, aron matubag ang kritisikal nga kakulangan sa mga classroom sa tibuok nasud.
Matud ni Gov. Uy, ang kakulang sa maayong learning spaces labina sa layong mga lugar nakapugong sa paglambo sa kalidad sa edukasyon ug nagpahinumdom sa responsibilidad sa tanan nga magpundar alang sa kaugmaon sa mga kabataan.
Iyang gipasabot nga ang maong balaodnong proposisyon naglatid ug komprehensibo ug madasigon nga plano aron mapaspasan ang pagtukod, pag-ayo, ug pag-upgrade sa mga classroom, nga uyon usab sa mga inisyatiba sa probinsya sa Zamboanga del Norte aron masiguro nga matag estudyante adunay angay ug hapsay nga lugar sa pagtuon.
Gihangyo ni Gov. Uy ang Kongreso ug si Presidente Ferdinand R. Marcos Jr. nga ipasang-at kini isip urgent bill, kay ang pagpundar sa mga classroom usa ka puhunan para sa nasudnong kalamboan.
Sa kataposang bahin sa iyang pamahayag, nanawagan ang gobernador sa panaghiusa sa tanan nga sektor, gikan sa gobyernong lokal ug nasyonal, mga mambabalaod, ug komunidad, aron makab-ot ang usa ka kaugmaon diin walay estudyanteng mabilin tungod sa kakulang sa classroom.(IKEN B. GULLEM)