Nakadawat og taas nga pag-ila ang City Government of Dapitan ubos sa pagpanguna ni Mayor Evelyn “Belen” T. Uy gikan sa Department of Social Welfare and Development (DSWD), human makakuha ang City Social Welfare and Development Office (CSWDO) og Level 3 “Fully Functional / Improved Service Delivery” rating sa bag-uhay nga Service Delivery Capacity Assessment (SDCA).
Kini nga opisyal assessment sa performance ug kapasidad sa CSWDO gipahigayon niadtong Marso hangtod Abril 2026.
Sa opisyal nga komunikasyon nga gipetsahan Hulyo 28, 2026, nga gipadala kang Mayor Uy ug CSWDO Head Marilyn S. Sy, gipahibalo sa DSWD nga nakab-ot sa Dapitan City ang SDCA Index Score nga 2.97.
Sumala sa mga sumbanan sa DSWD, ang Level 3 nga rating nagpasabot nga hingpit nga nakasunod ang opisina sa nasudnong mga sumbanan sa social welfare. Nagpakita usab kini sa kahibalo ug katakus sa mga personnel sa CSWDO, lig-on nga organisasyonal nga kapasidad, epektibong pagpatuman sa mga programa, ug padayon nga paghatag og kalidad nga serbisyo publiko.
Gipasalamatan ug giila sa DSWD ang lokal nga pangagamhanan tungod sa padayon nga dedikasyon, transparency, ug aktibong kooperasyon niini atol sa assessment. Matod sa ahensya, ang maong score nagpakita sa hiniusang paningkamot sa LGU sa paghatag og kalidad ug responsive nga serbisyo ngadto sa mga indibidwal, pamilya, ug komunidad nga nanginahanglan og suporta.
Samtang giila ang maong kalampusan, mipasalig ang DSWD nga magpadayon kini sa paghatag og tukmang technical assistance aron mas mapalambo ug mapadayon ang kapasidad sa lokal nga opisina.
Ang maong kalampusan usa ka dakong milestone sa padayon nga paningkamot sa Dapitan City sa pagpalig-on sa mga devolved social welfare programs, pagtabang sa pagpakunhod sa kakabos, ug paghatag og empowerment alang sa tanang Dapitanon ubos sa administrasyon ni Mayor Belen Uy ug CSWDO Head Marilyn S. Sy.(IKEN B GULLEM)
Source: Dapitan City Government