Misaad si Governor Darel Dexter T. Uy nga ipaayo ug i-rehabilitate ang karaan ug nagkadaot nga covered court sa Barangay Malinao, Baliguian aron masiguro ang kaluwasan sa mga residente ug mapadayon ang paggamit niini alang sa mga kalihokan sa komunidad.
Gisusi ni Gov. Uy ang kahimtang sa pasilidad uban sila Provincial Engineer Engr. Lane John Lim, Vice Mayor Cresencio Suson, mga opisyal sa barangay, ug mga residente nga nangandoy sa pagpaayo sa maong covered court.
Sumala sa mga residente, dugay na nilang gihangyo ang pag-rehabilitate sa pasilidad tungod sa padayong pagkadaot sa estruktura. Usa sa nanguna sa panawagan mao si Balmer Alas Villanueva, kinsa miingon nga una nang adunay request nga gipasa ngadto sa buhatan ni Uy pinaagi kang Jameson Mendong, coordinator sa Baliguian.
Ang covered court maoy ikaduhang pasilidad nga nahatag sa Barangay Malinao niadtong 2004 atol sa administrasyon ni kanhi Governor Isagani Amatong. Apan human sa daghang katuigan, nagkagrabe ang pagkadaot niini ug wala pa hingpit nga ma-rehabilitate.
Nabalaka usab ang mga residente sa kaluwasan sa mga mogamit sa pasilidad, ilabina panahon sa habagat ug kusog nga hangin nga mahimong makapaluag o makapalupad sa mga atop niini. Labaw nga gikabalak-an sa mga ginikanan ang kaluwasan sa mga kabataan nga kanunay magdula ug magtapok sa maong lugar.
Human sa inspeksyon, gimando ni Uy kang Engr. Lim ang pag-andam sa Program of Works (POW) isip kabahin sa preparasyon alang sa rehabilitasyon sa covered court.
Gilauman nga pinaagi sa maong lakang, mapasig-uli ang pasilidad ug mahimong mas luwas ug magamit pag-usab sa mga residente alang sa sports, mga kalihokan sa barangay, ug uban pang kalihokan sa komunidad.(IKEN B. GULLEM)
Source: Vice Mayor Crecensio Banaag Suson