Gitugotan sa Sangguniang Panlalawigan (SP) sa Zamboanga del Norte si Governor Darel Dexter T. Uy nga modawat og mga donasyon gikan sa Department of Health–Region IX (DOH-9) ug Department of Information and Communications Technology (DICT) atol sa ilang regular nga sesyon niadtong nilabay nga adlaw.
Miuyon ang mga miyembro sa SP nga hatagan og otoridad ang gobernador sa pagdawat sa usa ka unit sa ambulansya nga kompleto sa mga kagamitang medikal gikan sa DOH-9. Kini nga donasyon gitagana alang sa Liloy District Hospital aron mas mapalig-on ang serbisyong pang-emerhensiya sa maong dapit.
Dugang pa, sa parehas nga sesyon, gitugotan usab ang gobernador nga modawat ug mopirma sa Deed of Donation and Acceptance alang sa probinsya may kalabotan sa donasyon sa DICT nga girepresentahan ni Secretary Henry Rhoel R. Aguda.
Samtang, ang DICT nagdonar og 74 ka set sa mga tablet nga gamiton sa mga Rural Health Units (RHUs) ug Barangay Health Centers (BHCs). Kini makatabang sa mas hapsay nga pagdumala sa datos sa panglawas, lakip na ang pagrekord ug pagtipig sa impormasyon sa mga residente nga nakadawat og bakuna.(IKEN B. GULLEM)
Source: Zamboanga del Norte Provincial News Network