Gidasig ni Governor Darel Dexter T. Uy ang mga residente sa Barangay Milidan, Baliguian nga dili magduha-duha sa pagpangayo og tabang medikal atol sa Medical Mission and Service Caravan ubos sa AYUDA MEDIKAL PLUS program sa Provincial Government.
Gipahinumdoman sa gobernador ang mga residente nga dili angay mahadlok o maulaw sa pagpa-check-up ug pagdawat sa libre nga serbisyo, ilabi na sa mga adunay kabalaka sa gasto sa pagpa-doctor. Lakip sa mga serbisyo sa caravan ang medical check-up, tooth extraction ug paghatag og mga tambal.
Pinaagi sa AYUDA MEDIKAL PLUS, gidala mismo ngadto sa mga komunidad ang mga health service ug health workers aron mas dali kining maabot sa mga residente. Lakip sa mga naunang medical mission ang libreng konsultasyon, dental services, tambal ug specialist care, lakip ang pediatric surgery alang sa mga bata gikan sa nagkalain-laing bahin sa probinsya.
Gipasalig usab ni Governor Darel nga dili kutob sa maong kalihokan ang serbisyo medikal sa Provincial Government. Padayon ang pagdala sa healthcare services ngadto sa mga komunidad sa Zamboanga del Norte aron ang mga residente dili na kinahanglan mobiyahe og layo o magduha-duha sa pagpangayo og gikinahanglang tabang.(JENIFFER JR. DELICA)
Source: Provincial Government of Zamboanga del Norte