Gipailalom sa functionality assessment ang Provincial Council for the Protection of Children (PCPC) ug Provincial Committee on Anti-Trafficking and Violence Against Women and Children (PCAT-VAWC) atol sa assessment nga gipahigayon sa Department of the Interior and Local Government (DILG) Regional Office IX sa Provincial Capitol.
Gipangulohan sa Regional Inter-Agency Task Force alang sa Local Council for the Protection of Children (LCPC) ug Local Committee on Anti-Trafficking and Violence Against Women and Children (LCAT-VAWC) ang assessment aron masusi ang functionality ug pagka-epektibo sa duha ka konseho sa pagtuman sa ilang mga mandato ug responsibilidad.
Gitan-aw usab sa assessment ang mga kalig-on sa kasamtangang sistema, mga kakulangon, ug mga bahin nga kinahanglan pang mapalambo sa pagpatuman sa mga programa alang sa proteksyon sa kabataan, pagbatok sa trafficking ug VAWC, ug paghatag og serbisyo sa mga kabataan, kababayen-an ug uban pang vulnerable sectors.
Sa iyang opening remarks, gipasiugda ni OIC-Provincial Social Welfare and Development Officer Hannah Lou Gumapon-Mandantes nga ang mga dokumentong gisumite sa konseho nagpakita sa mga paningkamot sa probinsya sukad sa paglingkod ni Gobernador Darel Dexter T. Uy.
Nagpahayag usab og pagsalig si Board Member Kay Marie Bolando-Villarin sa trabaho sa Office of the Provincial Social Welfare and Development Officer ubos sa pagdumala ni Mandantes.
Sa PCPC assessment, gisusi ang organizational sustainability, mga polisiya ug plano alang sa kabataan, budget allocation, service delivery ug monitoring. Sa PCAT-VAWC, gitan-aw usab ang organisasyon, mga miting, polisiya ug plano, budget ug mga accomplishment sa komite.
Nagpakita usab og positibong resulta ang partial assessment nga nahimo niadtong maong adlaw, samtang gilauman nga ipagawas ang final rating sa probinsya sa Septiyembre 17.
Pinaagi sa maong assessment, masuta ang pagka-epektibo sa mga mekanismo ug programa sa probinsya alang sa proteksyon sa kabataan ug pagbatok sa trafficking ug VAWC, lakip ang mga bahin nga kinahanglan pang palig-onon aron mas mapaayo ang serbisyo sa mga nanginahanglan.(IKEN B. GULLEM)
Source: Zamboanga del Norte Provincial News Network