Nagdonar ang Local Government Unit (LGU) sa Siocon og usa ka motorsiklo ngadto sa 97th Infantry (Kalasaglahi) Battalion, 1st Infantry Division, Philippine Army aron mapalambo ang ilang mobility sa mga security operation sa lugar.
Gipangunahan ni Siocon Mayor Hon. Ceasar C. Soriano ang pagdonar, nga pormal nga giturn-over atol sa Monday Flag-Raising Ceremony sa Municipal Hall niadtong Setyembre 14, 2026.
Gilauman nga magamit sa 97IB ang motorsiklo sa ilang security patrols ug uban pang kalihokan nga nagkinahanglan og mas paspas ug mas flexible nga transportasyon, ilabina sa mga komunidad nga lisod maabtan.
Pinaagi sa maong donasyon, gipalig-on sa LGU Siocon ang suporta niini sa Philippine Army ug sa mga paningkamot aron mapadayon ang kalinaw ug seguridad sa munisipyo.
Gipasalamatan usab ni Lieutenant Colonel Jessie Bergonia, Battalion Commander sa 97IB, ang LGU Siocon tungod sa padayong pagsalig ug suporta sa Army.
Gipasiugda ni Bergonia nga importante ang padayong kooperasyon ug partnership tali sa lokal nga pangagamhanan ug security forces aron mas mapalig-on ang seguridad ug serbisyo sa mga komunidad.
Ang donasyon sa motorsiklo nahimong dugang nga pamatuod sa lig-ong pakigtambayayong sa LGU Siocon ug 97IB alang sa usa ka mas luwas ug malinawon nga komunidad.(IKEN B. GULLEM)
Source: 97th Infantry “Kalasaglahi” Batallion