Malampusong gipahigayon ang “Gender and Development (GAD) Executive Briefing/Orientation” nga gisalmotan ni City Mayor Darel Dexter T. Uy ug sa mga miyembro sa Sangguniang Panglungsod ilawom sa Kagamhanang Lokal ning dakbayan kaganihang buntag, Oktubre 29, ning tuiga didto sa Top Plaza Hotel ning dakbayan sa may alas-9:00 ang takna sa buntag. Ang maong kalihokan ang gipangunahan sa Strategy Management Division sa City Mayor’s Office ilawom sa pagdumala ni Mr. Ernesto B. Rojo Jr.
Tumong niini ang mahatagan sa dugang kahibalo ug giya ang Kagamhanang Lokal kabahin sa GAD ug papaunsa ang mga pamaagi aron mapatuman kini.
Ang maong kalihokan ang gitambongan ni kanhi Tourism Operations Chief sa Department of Tourism Region IX, Ms. Marilou G. Silorio, kinsa nagsilbi nga “resource speaker” may kalabot sa Gender and Development (GAD) ug ang mga balaod niini. Dugang pa niini, mipabati sa iyang mensahe sa pagpasalamat si Mayor Uy alang sa higayon nga makasalmot sila niining kalihokan aron mahatagan sila og dugang kahibalo kabahin sa GAD.
Aduna usa’y nahitabong “open forum” alang sa mga partisipantes diin ilang gibutyag ang ilang tagsa-tagsa ka mga opinyon ug panglantaw may kalabot sa GAD lakip na ang paghatag sa ilang mulo ug tinghuha ngadto sa “resource speaker”.
Natapos ang maong kalihokan pinaagi sa paghatag og pasidungog ni Ms. Silorio isip “resource speaker” sa nasangpit nga kalihokan ug gisundan sa pagkuha’g hulagway niini uban sa mga partisipantes.
(Source: City Information Office | Dipolog City Government Facebook page)