Pormal nga gilunsad sa Department of Information and Communications Technology (DICT) ang 204 ka Free WiFi sites sa 68 ka lokasyon sa 3rd District sa Zamboanga del Norte aron mapalapdan ang access sa digital connectivity sa mga residente.
Gipahigayon ang paglunsad atol sa DICT Digital Bayanihan Roadshow: Zamboanga del Norte sa Liloy Digital Transformation Center niadtong Huwebes, Hulyo 23.
Gimarkahan usab sa kalihokan ang milestone sa pag-apod-apod sa kapin 11,000 ka Bayanihan SIM cards sa 21 ka eskwelahan sa distrito, kauban ang sunod-sunod nga turnover sa nagkalain-laing ICT initiatives.
Mitambong sa kalihokan sila si Assistant Secretary for Regional Development June Vincent Manuel Gaudan, 3rd District Representative Adrian Michael Amatong, Regional Director Cheryl C. Ortega ug Liloy Mayor Roberto Uy Jr., kauban ang mga opisyal sa gobyerno ug stakeholders.
Kini nga inisyatiba gipadayon sa DICT sa tumong sa pagpalapad sa digital access sa 3rd District pinaagi sa paghatag og mas daghang oportunidad sa mga residente ug estudyante nga makakonekta sa internet ug makabenepisyo sa digital nga serbisyo.(IKEN B. GULLEM)
Source: DICT IX BASULTA