Misalmot sa paunang oryentasyon ang mga malampusong aplikante para sa Fire Officer 1 o FO1 sa Bureau of Fire Protection Region IX niadtong nilabay nga adlaw, isip pagpangandam sa ilang panumpa ug pormal nga pagsulod sa serbisyo.
Gipahigayon ang oryentasyon pinaagi sa Zoom ubos sa pagpanguna ni Regional Director FSSUPT Kadil T. Acalul, DSC. Gihisgutan dinhi ang mga kinahanglanon alang sa seremonya sa panumpa, mga dokumento nga isumite sa dili pa mosulod sa National Fire Training Institute, mga benepisyong mahimong madawat, ug uban pang proseso sa ilang pagsulod sa BFP.
Nahimo usab kining higayon aron matubag ang mga pangutana ug kabalaka sa mga aplikante ug masiguro nga andam sila sa mga sunod nga lakang sa proseso. Gipasiugda usab sa BFP nga ang ilang kalampusan resulta sa kaugalingon nilang paningkamot.
Gilauman nga madala sa mga bag-ong FO1 ang integridad, propesyonalismo, disiplina, ug dedikasyon sa ilang pagsugod sa pagserbisyo alang sa pagpanalipod sa kinabuhi, kabtangan, ug kaluwasan sa komunidad.(JENIFFER JR. DELICA)
Source: Bureau of Fire Protection Region IX