Malampusong gi-host sa Munisipyo sa Liloy ang Filipino Brand of Service Excellence (FBSE) Training niadtong Pebrero 23, 2026, nga nagtumong sa pagpalambo sa kalidad sa serbisyo sa sektor sa turismo sulod sa lungsod.
Gilaraw ang maong pagbansay aron mahatagan og kahibalo ug kahanas ang mga miyembro sa komunidad sa pagpatuman sa estandard nga serbisyo sa turismo sa Pilipinas ug sa lokal nga lebel. Gisundan kini sa duha ka adlaw nga Community-Based Tourism (CBT) Kulinarya Workshop niadtong Pebrero 24–25, 2026, nga nagpunting sa pagpaayo sa kahibalo ug abilidad sa pagluto sa mga lokal nga tourism stakeholders.
Dako usab ang pasalamat sa lokal nga panggamhanan kang Dara May L. Cataluña, Regional Director sa Department of Tourism Region IX, tungod sa iyang suporta ug dedikasyon sa pagpalambo sa community-based tourism sa Munisipyo sa Liloy.
Sumala sa lokal nga panggamhanan, ang maong mga inisyatiba kabahin sa padayon nga paningkamot sa paglig-on ug pagpalambo sa industriya sa turismo sa lungsod.(IKEN B. GULLEM)
Source: Municipality of Liloy