Mas gipakusgan pa sa Municipal Nutrition Office ang kampanya batok sa malnutrisyon pinaagi sa pagpahigayon sa One-Shot Feeding Program uban sa suporta sa Local Government Unit sa Salug, nga nagtumong sa paghatag og husto ug sustansiyadong pagkaon sa mga kabataan sa lungsod.
Kini nga inisyatiba kabahin sa mas lapad nga adbokasiya sa lokal nga panggamhanan sa pagpanalipod sa kahimsog sa kabataan, ilabi na sa mga kabarangayan nga adunay kabataan nga nanginahanglan og dugang nga pag-atiman sa nutrisyon. Gawas sa paghatag og pagkaon, gihatagan usab og kahibalo ang mga ginikanan bahin sa hustong pagpili ug pag-andam sa masustansiyang pagkaon alang sa ilang mga anak.
Gipasiugda usab sa administrasyon ni Dr. Ruth M. Brillantes ang kamahinungdanon sa pagtinabangay sa komunidad aron malikayan ang problema sa malnutrisyon. Sumala sa lokal nga liderato, ang maayong panglawas sa kabataan maoy pundasyon sa usa ka lig-on ug mauswagon nga Salug.(IKEN B. GULLEM)
Source: Municipality of Salug