Aron masiguro ang tukma ug kasaligan nga datos sa kahimtang sa trabaho sa probinsya, nagpahigayon og upat ka adlaw nga onboarding training ang Philippine Statistics Authority (PSA) Zamboanga del Norte alang sa April 2026 Labor Force Survey.
Gidumala ang pagbansay gikan Abril 4 hangtod 7 sa A4M Building sa Miputak, Dipolog City, diin mitambong ang walo ka bag-ong Statistical Researchers uban sa Assistant Statistician nga si Divine Angel A. Quisel.
Gipangunahan ang training ni Statistical Analyst Lanibel A. Pamatong, nga nagsilbing Provincial Focal Person, aron masiguro nga nasabtan sa mga partisipante ang hustong pamaagi sa pangolekta sa datos subay sa mga standard sa PSA.
Kini nga Labor Force Survey usa ka nasudnong survey nga nagtigom og impormasyon kabahin sa labor force participation, unemployment, oras sa trabaho, ug kasinatian sa trabaho sa mga Pilipino. Apil usab sa survey ang “rider questions” nga nagtutok sa informal employment ug unpaid care ug domestic work aron masukod ang oras nga gigahin sa mga buluhaton nga walay bayad.
Matud pa, importante ang maong training aron maandam ang mga field researchers sa ilang responsibilidad sa komunidad ug malikayan ang sayop sa pagkuha og datos nga mahimong makaapekto sa paghimo og mga polisiya.(IKEN B. GULLEM)
Source: PSA Zamboanga del Norte