DIPOLOG CITY — Giawhag ni Engr. Camilo G. Gudmalin ang mga tigbalita nga magpadayon sa pagpadayag sa kamatuoran ug paghatag og tingog sa katawhan atol sa ika-61 nga induction sa mga bag-ong opisyal sa Zamboanga del Norte Press Club niadtong Marso 28.
Matud niya, dako ang papel sa media isip “fourth pillar of democracy” tungod kay kini nagtabang sa pagpasabot, pagsusi, ug pag-monitor sa mga lihok sa gobyerno. Iyang gipahinumdoman ang mga mamamahayag nga ang ilang pangutana ug pagbantay maoy makapalig-on sa transparency ug accountability.
Giduso usab ni Gudmalin ang mga journalist nga dili mahadlok sa pagpangutana ug pagsukol sa sayop, ilabi na sa pagdala sa mga isyu sa komunidad ngadto sa publiko. Sumala kaniya, matag istorya nga isulti makatabang sa paghulma sa pagsabot sa katawhan.
Sa katapusan, misaad ang mga miyembro sa press club nga magpadayon sa responsableng journalism aron mapalig-on ang demokrasya ug mapalambo ang ilang komunidad.(JENIFFER JR. DELICA)
Source: Zamboanga del Norte Provincial News Network