LILOY, ZAMBOANGA DEL NORTE — Nakaangkon og tabang ang lima ka pamilya nga naapektuhan sa sunog niadtong Marso 5 pinaagi sa gift-giving activity nga gipahigayon sa Liloy Fire Station niadtong Marso 27 sa Brgy. Baybay.
Gipangunahan ni Acting Municipal Fire Marshal FINSP Dave C. Dela Cruz ang kalihokan diin gipanghatag ang mga batakang panginahanglan sama sa bugas, gamit sa panimalay, sinina, ug school bags alang sa mga bata nga naapektuhan.
Sumala sa mga otoridad, dako kining tabang aron makabangon pag-usab ang mga biktima ug makapadayon sa ilang adlaw-adlaw nga kinabuhi human sa pagkawala sa ilang mga panimalay.
Ang maong inisyatibo nagpakita nga bisan human sa kalamidad, nagpadayon ang panaghiusa ug pagtinabangay sa komunidad aron matabangan ang mga apektadong pamilya nga makasugod pag-usab.(JENIFFER JR. DELICA)
Source: BFP R9 Liloy Fire Station