Gipahibalo sa Local Government Unit sa Sindangan, ubos sa abtik ug matinud-anong pagpanguna ni Hon. Mayor Glona G. Labadlabad, ang pagpatuman sa Electronic Business One Stop Shop (eBOSS) nga pagahimuon gikan Enero 5 hangtod Enero 20, 2025, sa Sindangan People’s Government Center.
Ang eBOSS gitukod aron mapadali, mapasayon, ug mahimong episyente ang pagproseso sa business permits ug uban pang may kalabutan nga transaksyon, subay sa Republic Act No. 11032 o Ease of Doing Business Act. Ang tanang may kalabotan nga opisina sa lokal nga pangagamhanan motambong aron motabang sa mga aplikante ug masiguro ang hapsay ug sistematikong serbisyo sa gobyerno.
Gidasig ang tanang negosyante, aplikante, ug uban pang stakeholder nga mopahimulos niini nga serbisyo sulod sa gitakdang petsa.
Aron masiguro ang hapsay nga proseso ug hustong pag-atiman, gihangyo ang mga moapil nga magdala sa tanang gikinahanglan nga orihinal nga dokumento uban ang mga kopya alang sa pagsumite.(IKEN B. GULLEM)
Source: Local Government Unit of Sindangan