Malampusong napahigayon ang duha ka adlaw nga pagbansay-babsay alang sa “Maternal Infant and Young Child Feeding” nga gipasiugdahan sa Child Fund Philippines uban sa Lokal nga Kagamhanan ning dakbayan pinaagi sa City Nutrition Division nga gipahigayon didto sa Social Hall, City Hall, ning siyudad sa Dipolog, nga gisugdan niadtong nakalabay’ng adlaw, Setyembre 22, hangtod sa 23, ning tuig 2025.
Ang nasangpit nga kalihukan gitambungan sa mga partisipantes nga gilangkuban sa mga Barangay Nutrition Scholars (BNS) ug Barangay Health Workers (BHW) nga uban niini gikan sa Lungsod sa Sindangan, Manukan ug ning dakbayan sa Dipolog.
Nasayran nga Naghatag og mainitong suporta sa maong aktibidad si City Nutrition Action Officer, Ms. Riza Jane B. Zamoras, kauban nila City Nutrition Program Coordinators, Mr. Isaiah Thomas E. Lim, RND, Ms. Lane M. Sorronda, Ms. Marjorie D. Mainit ug Ms. Lovely C. Ada, RND isip mga resource speakers ug lecturers sa maong programa. Lakip sa mitambong mao sila CHO Coordinator, Ms. Marycris L. Torres, Child Fund PH Program Coordinator, Mr. Danilo Cabidog ug uban pa.
Tumong matud pa sa maong training, ang pagtutok sa kamahinungdanon sa eksklusibong Breast feeding, Complementary feeding lakip na usab ang tukmang pamaagi sa pagpakaon sa mga bata ug gagmay’ng anak ilabi na nga anaa pa sulod sa “First One Thousand Days” niini, aron maseguro ang ilang maayong panglawas ug kahimsog.
Dugang pa niini, nga kining maong programa maoy usa ka lakang aron palig-unon ang kapasidad sa mga Health Frontliners sa atong komunidad dinha sa pagtabang sa mga ginikanan ug matag pamilya kabahin sa pag-atiman sa Nutrisyon sa Inahan ug mga Kabataan.(Julius Esmade)
Source: DIPOLOG CITY GOVERNMENT