Gisubli pag-ila sa Department of Social Welfare and Development (DSWD) Region IX ang kahusayan sa pangagamhanan sa Dapitan City human kini gihatagan og pasidungog alang sa “outstanding governance” ug taas nga lebel sa pagsunod sa social welfare standards.
Gihimo ang awarding isip kabahin sa ika-75 nga anibersaryo sa DSWD niadtong Marso 26, 2026 sa Astoria Regency Convention Center, diin nagtigom ang nagkalain-laing local government units ug partner agencies sa rehiyon.
Sumala sa report, nakaangkon ang Dapitan og 95.60 porsyentong compliance rating—usa ka timailhan sa lig-on ug epektibong implementasyon sa mga programa alang sa kabos, kababayen-an, kabataan, senior citizens ug uban pang sektor nga nanginahanglan og suporta.
Gipasiugda usab ni Mayor Evelyn Uy ang importansya sa inclusive governance, diin ang tanang sektor apil sa plano ug implementasyon sa mga programa sa syudad. Pinaagi sa mas hugot nga panagtinabangay sa komunidad, napalambo ang pag-abot sa serbisyo ngadto sa mga benepisyaryo.
Samtang, dako ang papel sa City Social Welfare and Development Office (CSWDO sa kalampusan sa Dapitan, nga giila usab isip usa sa mga outstanding offices sa maong kalihokan.
Sa laing bahin, kini nga selebrasyon nga may temang “Maagap at Mapagkalingang Serbisyo” naghatag og higayon sa mga ahensya ug LGU sa Region IX nga mapalig-on ang ilang paningkamot sa paghatag og episyente ug maloloy-on nga serbisyo publiko.(IKEN B. GULLEM)
Source: City Government of Dapitan